PRESS RELEASE
Vawin ni 23rd February,2019(Inrinni) chhun dar 12:00 khan MZP Conference hall-ah emergency meeting neih a ni a, Meeting hi Tv. L. Ramdinliana Renthlei, President chuan a kaihhruai a ni.
India sorkarin Mizoram leh hmarchhak state dang palia Assam Rifles hnena Armed Forces (Special Powers) Act hmanga thuneihna pek tumna a awm hi MZP chuan pawi a ti a, MZP chuan theihtawp chhuaha dodal a tum a ni. Armed Forces (Special Powers) Act hi MZP telna North East Students Organisation (NESO) chuan hun rei tak chhung thiat turin India a lo ngen tawh a, chu ngenna chu a ngai pawimawh lo mai ni lova state pangaah Assam Rifles te he dan hmanga thuneihna pek a tum hi MZP chuan na a ti a, India sorkarin tunah he a thil tum hi titawp rihin, ngaihtuah that leh turah a dah a, titawp hlen tur leh he dan hi thiat turin MZP chuan India sorkar a phut a ni. Armed Forces (Special Powers) Act hian sipaite hnenah warrant tel lova mi man theihna te, mi veh leh mi in dap theihna te, silai hmeh puah phalna thlengin a pe a, hmarchhak state thenkhatah he dan hi hman mek a nih bakah tunah Mizoram leh state dang paliah Assam Rifles te chu warrant tel lova mi man phalna leh thil zawn phalna pek a tum leh hi MZP chuan hriatthiam har a ti a ni.
He Act hi Zoramin zalenna a sual laiin India sorkarin Mizoramah a lo hmang tawh a, danin mi man leh mi tihduhdah phalna a pek angin India sipaite'n nasa takin Mizo mipui min lo tiduhdah tawh. Khang laia kan tuarna kha intihduhdahna satliah ni lovin, dan hmang ngeia intihduhdahna a ni a, danin sepcial power a pek India sipaite'n Mizote kutthlaka an duh duh an man te, jail an tantir te, chhek in an hal te, kan in leh lo an tichhia te, pawngsual thlenga min tihduhdahnate kha Armed Forces (Special Powers) Act hun laia thleng a ni a, vawiin thlengin rilru na leh rilru lama harsatna tawk te, ramtuileilova awm te pawh an la awm a ni tih hi India hian lo hre rawh se.
Armed Forces (Special Powers) Act vanga Mizote tuarna zozai kha MZP chuan a la theihnghilh thei lo a, India-in Mizote a hmuhsitzia hi na a tih reng bakah kan thenawm state-a kan unaute chungah he dan hi hman a la ni hi na a tihpui a, Assam Rifles te he dan hmanga kan chunga inlek phalsak tumna a awm hi MZP chuan hriatthiam har a ti tak zet a ni.
Zalenna sual laia India-in Mizo mipui a tihduhdahnate duhtawk lo ni awm ziazanga he dan a rawn sawi ri leh hi Mizo mipuite tan hriatthiam a har a, Mizo mipuite chu he thil dodal tura tangrual turin MZP chuan a ngen a ni.He Act hi khawvelin a pawm lo a, human rights hum tumtu pawl hrang hrangte pawhin rapthlak an ti a, he dan hi thiat turin India sorkar an ngen thin. Khawvelin 'draconian law' ti hialin a sawi a, 'licence to kill' inpekna dan tiin a sawi thin bawk. Chu dan rapthlak tak mai chu Mizoram leh hmarchhaka hmang lo turin MZP chuan India sorkar a ngen a, he dan hi thiata titawp nghal turin a ngen bawk a ni.
Hemi chungchangah hian MZP chuan India ram prime minister hnenah lehkha thehluh a tum a, hemi atana ministry of home affairs-in order an chhuah pawh hal a tum a ni.Tin, tunlai thil thleng, Mizoram hmun hrang hranga sipai an inzar pharh chungchang pawh MZP chuan a ngaihtuah a, khaw hrang hrangah Assam Rifles-in an inkhuar a, an inkhuarna khaw mipuite bangbo tak leh hlauthawng ru taka an awm te chu pawi a ti a, chutiang hun kan tawn laia India sorkarin Assam Rifles te warrant tel lova mi man phalna pek a tum uaih uaih mai hi MZP chuan mak a tiin sipaite hi exercise la anga sawi an ni tlat mai te hi thil ngaihthatthlak loh inphum theihah a ngai a, mipuite himna ngaihtuah tur leh thlamuan turin Mizoram sorkar a beisei a ni.
Sd/-
(LALNUNMAWIA PAUTU)
General Secretary
No comments:
Post a Comment